1ܘܗَܘܹܐܠܵܗ̇؛ ܟܲܕ ܐܵܦܲܠܘܼ ܓܵܘ ܩܘܿܪܲܢܬܘܿܣ ܝܼܗَܘܵܐ؛ ܕܚܕܸܪܹܗ ܦܵܘܠܘܿܣ ܒܐܲܬܪ̈ܵܘܵܬܹܐ ܥܸܠܵܝܹ̈ܐ ܘܐَܬܹܐܠܹܗ ܠܐܵܦܸܣܘܿܣ؛ ܘܒܵܩܸܪ ܗَܘܵܐ ܡ̣ܢ ܬܲܠܡܝܼܕܹ̈ܐ ܐܵܢܝܼ ܕܡܘܼܫَܟ̰ܚܵܝܠܹܗ ܬܵܡܵܐ. 2ܕܐܸܢ ܩܘܼܒܸܠܵܘܟ̣ܘܿܢ ܪܘܼܚܵܐ ܕܩܘܼܕܫܵܐ ܟܲܕ ܗܘܼܡܸܢܵܘܟ̣ܘܿܢ؛ ܐܵܡܪܝܼ ܐܸܠܹܗ؛ ܐܘܼܦ ܐܸܢ ܐܝܼܬ ܪܘܼܚܵܐ ܕܩܘܼܕܫܵܐ ܠܹܐ ܝܘܲܚ ܫܸܡܥܝܹܐ. 3ܐܵܡܸܪ ܐܸܠܵܝܗܝ؛ ܒܲܣ ܒܡܘܼܕܝܼ ܥܡܸܕܠܵܘܟ̣ܘܿܢ؛ ܐܵܡܪܝܼ؛ ܒܡܲܥܡܘܿܕܝܼܬܵܐ ܕܝܘܿܚܲܢܵܢ. 4ܐܵܡܸܪ ܐܸܠܵܝܗܝ ܦܵܘܠܘܿܣ؛ ܝܘܿܚܲܢܵܢ ܡܘܼܥܡܸܕܠܹܗ ܡܲܥܡܘܿܕܝܼܬܵܐ ܕܬܝܵܒ̣ܘܼܬܵܐ؛ ܟܲܕ ܐܵܡܸܪ ܠܛܵܝܸܦܵܐ؛ ܕܗܲܡܸܢܝܼ ܒܗ̇ܘ ܕܒܹܐܬܵܝܵܐ ܗَܘܵܐ ܒܵܬَܪܹܗ؛ ܕܝܼܠܹܗ ܝܼܫܘܿܥ ܡܫܝܼܚܵܐ. 5ܘܟܲܕ ܫܡܸܥܠܗَܘܿܢ ܐܲܢܹܐ؛ ܥܡܸܕܠܗَܘܿܢ ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. 6ܘܡܘܼܬܸܒ̣ܠܹܗ ܐܝܼܕܵܐ ܥܲܠܵܝܗܝ ܦܵܘܠܘܿܣ؛ ܘܐَܬܹܐܠܹܗ ܪܘܼܚܵܐ ܕܩܘܼܕܫܵܐ ܥܲܠܵܝܗܝ؛ ܘܗܲܡܙܸܡܝܼ ܗَܘܵܘ ܒܠܸܫܵܢܵܐ ܠܸܫܵܢܵܐ ܘܢܵܒܝܼ ܗَܘܵܘ. 7ܐܝܼܢܵܐ ܟܠܵܝܗܝ ܗܵܘܝܼ ܗَܘܵܘ ܐܲܝܟܼ ܬܪܸܥܣܲܪ ܐَܢܵܫܹ̈ܐ. 8ܘܥܒܼܸܪܹܗ ܗ̇ܘ ܓܵܘ ܟܢܘܼܫܬܵܐ؛ ܘܗܲܡܙܸܡ ܗَܘܵܐ ܒܓ̰ܘܼܪܐܲܬ ܬܠܵܬܵܐ ܝܲܪ̈ܚܹܐ؛ ܒܸܕܪܵܫܵܐ ܘܒܸܥܒ̣ܵܕܵܐ ܠܗܲܡܘܼܢܹܐ ܒܘܼܬܿ ܕܡܲܠܟܘܼܬܹܗ ܕܐܲܠܵܗܵܐ. 9ܐܝܼܢܵܐ ܐَܢܵܫܹ̈ܐ ܡܸܢܵܝܗܝ ܦܵܝܫܝܼ ܗَܘܵܘ ܡܘܼܩܫܝܹܐ ܘܠܹܐ ܡܲܨܝܸܬܝܼ ܗَܘܵܘ؛ ܗܲܡܙܘܼܡܹܐ ܚܸܪܒܵܐ ܥܲܠ ܕܗ̇ܝ ܐܘܼܪܚܵܐ ܩܵܕَܡ ܟܸܢܫܵܐ. ܘܦܠܸܛܠܹܗ ܡܢ ܠܟܸܣܠܵܝܗܝ ܘܦܪܸܫܠܹܗ ܠܬܲܠܡܝܼܕܹ̈ܐ؛ ܘܟܠ ܝܘܿܡ ܕܵܪܸܫ ܗَܘܵܐ ܓܵܘ ܡܲܕܪܲܫܬܵܐ ܕܛܘܼܪܵܢܘܿܣ. 10 ܘܐܵܗܵܐ ܗَܘܹܐܠܵܗ̇ ܬܲܪ̈ܬܹܝ ܫܸܢܹ̈ܐ؛ ܗܲܕܟ̣ܵܐ ܕܫܡܸܥܠܗَܘܿܢ ܗܹܡܸܙܡܵܢ ܕܡܵܪܝܵܐ ܟܠܵܝܗܝ ܕܥܵܡܪܝܼ ܗَܘܵܘ ܓܵܘ ܐܵܣܝܼܵܐ؛ ܝܗَܘܼܕܵܝܹ̈ܐ ܘܝܵܘܢܵܝܹ̈ܐ. 11ܘܚܲܝ̈ܠܹܐ ܦܪ̈ܝܼܫܹܐ ܟܹܐ ܥܵܒܸܕ ܗَܘܵܐ ܐܲܠܵܗܵܐ ܒܐܝܼܕܹܗ ܕܦܵܘܠܘܿܣ. 12ܗܲܕܟ̣ܵܐ ܕܐܘܼܦ ܡ̣ܢ ܝܵܠܸܚܝܵܬܹ̈ܐ ܥܲܠ ܦܲܓ̣ܪܹܗ ܝܲܢ ܒܲܪ̈ܒ̣ܵܢܹܐ ܡܲܝܬܝܼ ܗَܘܵܘ ܘܡܲܬܒܼܝܼ ܗَܘܵܘ ܠܗَܘܿܢ ܠܟܸܣ ܡܸܪ̈ܥܝܹܐ؛ ܘܦܵܪܩܝܼ ܗَܘܵܘ ܡܸܢܵܝܗܝ ܡܲܪ̈ܥܹܐ؛ ܘܐܘܼܦ ܪ̈ܘܼܚܹܐ ܒܝܼܫܹ̈ܐ ܟܹܐ ܦܵܠܛܝܼ ܗَܘܵܘ ܡܸܢܵܝܗܝ. 13ܐܝܼܢܵܐ ܒܥܹܐܠܗَܘܿܢ ܐܘܼܦ ܐَܢܵܫܹ̈ܐ ܝܗَܘܼܕܵܝܹ̈ܐ؛ ܐܵܢܝܼ ܕܟܹܐ ܚܲܕܪܝܼ ܗَܘܵܘ ܘܡܲܡܝܵܢܹ̈ܐ ܒܫܹܐܕܹ̈ܐ؛ ܕܡܲܡܝܼ ܗَܘܵܘ ܒܫܸܡܹܗ ܕܡܵܪܲܢ ܝܼܫܘܿܥ؛ ܥܲܠ ܕܐܵܢܝܼ ܕܐܝܼܬ ܗَܘܵܘ ܠܗَܘܿܢ ܪ̈ܘܼܚܹܐ ܛܲܡܹ̈ܐܐ؛ ܟܲܕ ܐܵܡܪܝܼ؛ ܡܲܡܘܼܝܹܐ ܝܘܲܚ ܐܸܠܵܘܟ̣ܘܿܢ ܒܝܼܫܘܿܥ؛ ܗ̇ܘ ܕܡܲܟܪܘܼܙܹܐ ܝܠܹܗ ܦܵܘܠܘܿܣ. 14ܐܝܼܢܵܐ ܐܝܼܬ ܗَܘܵܘ ܫܲܒ̣ܥܵܐ ܒܢܘܼܢܹ̈ܐ ܕܚܲܕَ ܓܲܒܼܪܵܐ ܝܗَܘܼܕܵܝܵܐ؛ ܓܘܼܪܵܐ ܕܟܵܗܢܹ̈ܐ ܕܫܸܡܹܗ ܗَܘܵܐ ܣܩܹܘܵܐ؛ ܕܟܹܐ ܥܵܒ̣ܕܝܼ ܗَܘܵܘ ܐܵܗܵܐ. 15ܘܓ̰ܘܼܘܸܒܠܵܗ ܪܘܼܚܵܐ ܒܝܼܫܬܵܐ ܘܐَܡܸܪܵܗ̇ ܐܸܠܵܝܗܝ؛ ܠܝܼܫܘܿܥ ܒܝܼܕܲܥܝܵܐ ܝܘܵܢ؛ ܘܠܦܵܘܠܘܿܣ ܒܝܼܕܲܥܝܵܐ ܝܘܵܢ؛ ܐܝܼܢܵܐ ܐܲܚܬܘܿܢ ܡܵܢܝܼ ܝܬܘܿܢ. 16ܘܫܘܸܪܹܐ ܥܲܠܵܝܗܝ ܗ̇ܘ ܓܲܒܼܪܵܐ ܕܐܝܼܬ ܗَܘܵܐ ܒܝܹܗ ܪܘܼܚܵܐ ܒܝܼܫܬܵܐ؛ ܘܓܼܠܝܼܒܠܹܗ ܥܲܠ ܟܠܵܝܗܝ؛ ܘܡܸܚܝܵܝܠܹܗ؛ ܗܲܕܟ̣ܵܐ ܕܫܘܼܠܚܵܝܹ̈ܐ ܘܕܲܪ̈ܒܵܢܹܐ ܥܪܸܩܠܗَܘܿܢ ܡ̣ܢ ܗ̇ܘ ܒܲܝܬܵܐ. 17ܘܐܵܗܵܐ ܦܸܫܠܵܗ̇ ܝܕܥܝܼܬܵܐ ܠܟܠܵܝܗܝ ܝܗَܘܼܕܵܝܹ̈ܐ ܘܝܵܘܢܵܝܹ̈ܐ ܕܥܵܡܪܝܼ ܗَܘܵܘ ܓܵܘ ܐܵܦܸܣܘܿܣ. ܘܢܦܸܠܵܗ ܙܕܘܼܥܬܵܐ ܥܲܠ ܟܠܵܝܗܝ؛ ܘܗَܘܹܐܠܹܗ ܓܘܼܪܵܐ ܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. 18ܘܪܵܒܵܐ ܡ̣ܢ ܕܐܵܢܝܼ ܕܗܘܼܡܸܢܘܿܢ ܐܵܬܝܼ ܗَܘܵܘ ܘܡܵܘܕܝܼ ܗَܘܵܘ؛ ܘܗܵܩܝܼ ܗَܘܵܘ ܡܸܢܕܝܼ ܕܥܒ̣ܝܼܕܹܐ ܗَܘܵܘ. 19ܐܘܼܦ ܪܵܒܵܐ ܡ̣ܢ ܚܲܪ̈ܵܫܹܐ ܓ̰ܘܼܡܸܥܠܗَܘܿܢ ܟܬܵܒ̣ܵܝ̈ܗܝ؛ ܘܡܘܼܩܕܵܝܠܗَܘܿܢ ܩܵܕَܡ ܟܠܵܝܗܝ. ܘܚܘܼܫܒܸܢܗَܘܿܢ ܛܝܼܡܵܝܗܝ؛ ܘܡܘܼܫَܟ̰ܸܚܠܗَܘܿܢ ܚܲܡܸܫ ܪܸ̈ܒܘܵܬܵܐ ܕܣܹܐܡܵܐ. 20ܗܲܕܟ̣ܵܐ ܒܚܲܝܠܵܐ ܓܘܼܪܵܐ ܙܲܪܒܸܢܵܐ ܗَܘܵܐ ܘܙܵܝܕܵܐ ܗَܘܵܐ ܗܹܡܸܙܡܵܢ ܕܡܵܪܝܵܐ. 21ܐܝܼܢܵܐ ܟܲܕ ܦܸܫܠܗَܘܿܢ ܬܘܼܡܸܡܹܐ ܐܲܢܹܐ؛ ܡܘܼܬܸܒ̣ܠܹܗ ܦܵܘܠܘܿܣ ܒܪܘܼܚܹܗ ܕܟܲܕ ܚܵܕܸܪ ܗَܘܵܐ ܒܡܵܩܹܕܘܿܢܝܼܵܐ ܘܒܵܐܟ̣ܵܐܝܼܵܐ؛ ܐܵܙܸܠ ܗَܘܵܐ ܠܐܘܿܪܸܫܠܸܡ؛ ܘܐَܡܸܪܹܗ؛ ܒܵܬَܪ ܕܗܵܘܸܢ ܬܵܡܵܐ؛ ܘܵܓ̰ܸܒ ܝܼܠܵܗ̇ ܕܐܘܼܦ ܪܗَܘܿܡܹܐ ܚܵܙܸܢܵܗ̇. 22ܘܫܘܼܕܸܪܹܗ ܬܪܹܝ ܐَܢܵܫܹ̈ܐ ܡܐܵܢܝܼ ܕܥܵܒ̣ܕܝܼ ܗَܘܵܘ ܠܹܗ ܚܸܠܡܲܬ ܠܡܵܩܹܕܘܿܢܝܼܵܐ؛ ܠܛܝܼܡܵܬܹܐܘܿܣ ܘܠܵܐܪܸܣܛܘܿܣ. ܐܝܼܢܵܐ ܗ̇ܘ ܦܸܫܠܹܗ ܚܲܕَ ܙܲܒ̣ܢܵܐ ܓܵܘ ܐܵܣܝܼܵܐ. 23ܘܗَܘܹܐܠܹܗ ܒܗ̇ܘ ܙܲܒ̣ܢܵܐ ܫܓ̣ܘܼܫܝܵܐ ܪܵܒܵܐ ܥܲܠ ܕܐܵܗܵܐ ܐܘܼܪܚܵܗ ܕܐܲܠܵܗܵܐ. 24ܣܵܒܵܒ ܚܲܕَ ܙܲܪܓܵܪ ܕܫܸܡܹܗ ܕܸܡܲܛܪܝܼܘܿܣ؛ ܕܟܹܐ ܬܵܪܸܨ ܗَܘܵܐ ܩܘܼܒܵܬܹ̈ܐ ܕܣܹܐܡܵܐ ܠܐܵܪܛܹܡܝܼܣ؛ ܟܹܐ ܡܲܙܝܸܕ ܗَܘܵܐ ܠܐܘܼܡܵܢܹ̈ܐ ܦܲܝܕܵܐ ܪܵܒܵܐ. 25ܐܲܢܹܐ ܓ̰ܘܼܡܸܥܝܵܝܠܹܗ؛ ܘܠܐܵܢܝܼ ܕܦܵܠܚܝܼ ܗَܘܵܘ ܥܲܡܵܝܗܝ؛ ܘܐَܡܸܪܹܗ ܐܸܠܵܝܗܝ؛ ܓܲܒܼܪܹ̈ܐ؛ ܒܝܼܕܲܥܝܵܐ ܝܬܘܿܢ ܕܩܢܵܝܬܲܢ ܡܐܵܗܵܐ ܦܘܼܠܚܵܢܵܐ ܝَܠܵܗ̇. 26ܐܘܼܦ ܐܲܚܬܘܿܢ ܒܸܫܡܲܥܝܵܐ ܝܬܘܿܢ ܘܒܸܚܙܵܝܵܐ ܝܬܘܿܢ؛ ܕܠܹܐ ܗَܘܵܐ ܗܲܪ ܒܐܵܦܸܣܘܿܣ؛ ܐܝܼܢܵܐ ܐܘܼܦ ܚܲܕَܟ̰ܵܐ ܦܵܝܫܵܐ ܒܟܠܵܗ̇ ܐܵܣܝܼܵܐ؛ ܐܵܗܵܐ ܦܵܘܠܘܿܣ ܥܒܼܸܕܠܹܗ ܠܗܲܡܘܼܢܹܐ ܘܡܘܼܕܸܪܹܐ ܪܵܒܵܐ ܛܵܝܸܦܵܐ؛ ܟܲܕ ܐܵܡܸܪ؛ ܕܠܹܐ ܝܢܵܐ ܐܲܠܵܗܹ̈ܐ ܐܲܢܹܐ ܕܦܵܝܫܝܼ ܬܘܼܪܨܹܐ ܒܐܝܼܕܵܬܹ̈ܐ. 27ܘܠܵܐ ܗܲܪ ܐܵܗܵܐ ܫܘܼܠܵܐ ܕܝܲܢ ܒܙܕܘܼܥܬܵܐ ܝܠܹܗ ܕܐܵܬܹܐ ܠܡܲܣܠܵܝܬܵܐ؛ ܐܸܠܵܐ ܐܘܼܦ ܕܗܲܝܟܠܵܐ ܕܐܵܪܛܹܡܝܼܣ ܐܲܠܵܗܬܵܐ ܓܘܼܪܬܵܐ ܦܵܝܸܫ ܚܫܝܼܒ̣ܵܐ ܐܲܝܟܼ ܠܵܐ ܡܸܢܕܝܼ؛ ܘܐܘܼܦ ܓܘܼܪܘܼܬܘܼܗ̇؛ ܗ̇ܝ ܕܟܠܵܗ̇ ܐܵܣܝܼܵܐ ܘܟܠܵܗ̇ ܕܘܼܢܝܹܐ ܒܸܣܓ̣ܵܕܵܐ ܝܢܵܐ ܐܸܠܵܗ̇؛ ܦܵܝܫܵܐ ܡܘܼܣܠܝܼܬܵܐ. 28ܘܟܲܕ ܫܡܸܥܠܗَܘܿܢ ܐܲܢܹܐ؛ ܦܸܫܠܗَܘܿܢ ܡܸܠܝܹܐ ܚܸܡܬܵܐ؛ ܘܡܲܩܘܸܚܝܼ ܗَܘܵܘ ܘܐܵܡܪܝܼ؛ ܓܘܼܪܬܵܐ ܝَܠܵܗ̇ ܐܵܪܛܹܡܝܼܣ ܕܐܵܦܸܣܵܝܹ̈ܐ. 29ܘܦܸܫܠܵܗ̇ ܫܓ̣ܝܼܫܬܵܐ ܟܠܵܗ̇ ܡܕܝܼܢَܬܵܐ؛ ܘܪܚܸܛܠܗَܘܿܢ ܡܸܚܕܵܕܹ̈ܐ ܘܐَܙܸܠܗَܘܿܢ ܠܬܹܐܵܛܪܘܿܢ؛ ܘܓ̰ܢܸܒܼܠܗَܘܿܢ ܥܲܡܵܝܗܝ ܠܓܵܐܝܼܘܿܣ ܘܠܵܐܪܸܣܛܲܪܟ̣ܘܿܣ؛ ܐَܢܵܫܹ̈ܐ ܡܵܩܹܕܘܿܢܵܝܹ̈ܐ؛ ܚܲܒ̣ܪ̈ܵܘܵܬܹܐ ܕܦܵܘܠܘܿܣ ܒܐܘܼܪܚܵܐ. 30ܘܦܵܘܠܘܿܣ ܒܸܒܲܥܝܵܐ ܗَܘܵܐ ܕܥܵܒܼܸܪ ܠܟܸܣ ܛܵܝܸܦܵܐ؛ ܘܩܲܡ ܡܲܟܠܝܼ ܠܹܗ ܬܲܠܡܝܼܕܹ̈ܐ. 31ܘܐܘܼܦ ܡ̣ܢ ܪܹ̈ܫܵܢܹܐ ܕܐܵܣܝܼܵܐ؛ ܣܵܒܵܒ ܕܕܵܘܣܬܘܼ̈ܗܝ ܗَܘܵܘ؛ ܫܘܼܕܸܪܗَܘܿܢ ܦܘܼܪܦܸܠܗَܘܿܢ ܒܝܹܗ ܕܠܵܐ ܝܵܗَܒܸܠ ܗَܘܵܐ ܓܵܢܹܗ ܠܥܒܼܵܪܵܐ ܠܬܹܐܵܛܪܘܿܢ. 32ܐܝܼܢܵܐ ܟܸܢܫܵܐ ܫܓ̣ܝܼܫܵܐ ܗَܘܵܐ؛ ܘܚܲܕَܟܡܵܐ ܡܲܩܘܸܚܝܼ ܗَܘܵܘ ܚܲܕَ ܡܸܢܕܝܼ؛ ܘܐَܚܹܪَ̈ܢܹܐ ܡܸܢܕܝܵܢܹ̈ܐ ܐَܚܹܪَ̈ܢܹܐ. ܐܝܼܢܵܐ ܪܵܒܵܐ ܡܸܢܵܝܗܝ ܠܹܐ ܝܲܕܥܝܼ ܗَܘܵܘ ܣܵܒܵܒ ܕܡܘܼܕܝܼ ܓ̰ܸܡܥܝܹܐ ܗَܘܵܘ. 33ܐܝܼܢܵܐ ܥܲܡܵܐ ܕܝܗܘܼܕܵܝܹ̈ܐ ܕܐܝܼܬܼ ܗَܘܵܘ ܬܵܡܵܐ ܡܘܼܩܸܡܠܗَܘܿܢ ܡܸܢܵܝܗܝ ܠܓܲܒܼܪܵܐ ܝܗܘܼܕܵܝܵܐ ܕܫܸܡܹܗ ܗَܘܵܐ ܐܵܠܹܟܣܲܢܕܪܘܿܣ. ܘܟܲܕ ܩܸܡܠܹܗ ܫܥܸܫܠܹܗ ܐܝܼܕܹܗ؛ ܘܒܲܥܝܹܐ ܗَܘܵܐ ܠܓ̰ܲܘܘܼܒܹܐ ܠܛܵܝܸܦܵܐ. 34ܘܟܲܕ ܝܕܸܥܠܗَܘܿܢ ܕܝܗَܘܼܕܵܝܵܐ ܗَܘܵܐ؛ ܡܘܼܩܘܸܚܠܗَܘܿܢ ܟܠܵܝܗܝ ܒܚܲܕَ ܩܵܠܵܐ ܐܲܝܟܼ ܬܲܪ̈ܬܹܝ ܣܵܥܲܬܹ̈ܐ؛ ܓܘܼܪܬܵܐ ܝَܠܵܗ̇ ܐܵܪܛܹܡܝܼܣ ܕܐܵܦܸܣܵܝܹ̈ܐ. 35ܘܟܲܕ ܡܘܼܫܠܹܐܠܹܗ ܪܹܫܵܐ ܕܡܕܝܼܢَܬܵܐ ܠܟܸܢܫܵܐ؛ ܐܵܡܸܪ؛ ܓܲܒܼܪܹ̈ܐ ܐܵܦܸܣܵܝܹ̈ܐ؛ ܣܵܒܵܒ ܡܵܢܝܼ ܡ̣ܢ ܒܢܲܝ̈ܢܵܫܵܐ ܠܹܐ ܝܠܹܗ ܒܝܼܕܲܥܝܵܐ ܕܡܕܝܼܢَܬܵܐ ܕܐܵܦܸܣܵܝܹ̈ܐ ܢܵܛܪܲܬَ ܗܲܝܟܠܵܐ ܝَܠܵܗ̇ ܕܐܵܪܛܹܡܝܼܣ ܓܘܼܪܬܵܐ؛ ܘܠܨܲܠܡܘܼܗ̇ ܕܡ̣ܢ ܫܡܲܝܵܐ ܨܠܹܐܠܹܗ. 36 ܣܵܒܵܒ ܗܲܕܟ̣ܵܐ ܠܕܲܪܩܘܼܒ̣ܠ ܕܐܲܢܹܐ ܡܸܢܕܝܵܢܹ̈ܐ ܐَܢܵܫܵܐ ܠܹܐ ܡܵܨܹܐ ܠܗܲܡܙܘܼܡܹܐ؛ ܘܵܓ̰ܸܒ ܝܼܠܵܗ̇ ܕܗܵܘܝܼܬܘܿܢ ܫܸܠܝܹ̈ܐ؛ ܘܠܵܐ ܥܵܒ̣ܕܝܼܬܘܿܢ ܡܸܢܕܝܼ ܒܡܲܠܝܲܙܬܵܐ. 37ܣܵܒܵܒ ܕܡܘܼܝܬܹܐܠܵܘܟ̣ܘܿܢ ܠܐܲܢܹܐ ܓܲܒܼܪܹ̈ܐ ܟܲܕ ܠܵܐ ܫܵܠܚܵܢܹ̈ܐ ܕܗܲܝܟܠܹ̈ܐ؛ ܘܠܵܐ ܓܵܕܦܵܢܹ̈ܐ ܠܐܲܠܵܗܬܲܢ. 38ܐܝܼܢܵܐ ܐܸܢ ܐܵܗܵܐ ܕܸܡܛܲܪܝܼܘܿܣ ܘܚܲܒ̣ܪ̈ܵܘܵܬܘܼܗܝ ܒܐܘܼܡܵܢܘܼܬܵܐ ܐܝܼܬ ܠܗَܘܿܢ ܚܲܒܪܵܐ ܥܲܡ ܚܲܕَ ܐَܢܵܫܵܐ؛ ܗܵܐ؛ ܙܲܒ̣ܢܹ̈ܐ ܕܕܝܼܘܵܢ ܐܝܼܬ؛ ܘܐܝܼܬ ܕܲܝܵܢܹ̈ܐ؛ ܚܘܼܫ ܡܵܚܝܼ ܕܲܪܗܲܩ ܚܲܕَ ܠܗ̇ܘ ܐَܚܹܪَܢܵܐ. 39ܘܐܸܢ ܡܸܢܕܝܼ ܐَܚܹܪَܢܵܐ ܒܸܒܲܥܝܵܐ ܝܬܘܿܢ؛ ܒܓ̰ܲܡܵܥܲܬ ܢܵܡܘܿܣܵܝܬܵܐ ܦܵܐܹܫ ܫܸܪܝܵܐ. 40ܣܵܒܵܒ ܐܘܼܦ ܐܵܕܝܼܵܐ ܒܩܹܘܲܢܕܹܢܘܿܣ ܒܸܟܠܵܝܵܐ ܝܘܲܚ ܕܦܵܝܫܵܐ ܡܚܝܼܬܵܐ ܕܲܪܗܲܩܲܢ ܥܲܠ ܫܓ̣ܘܼܫܝܵܐ ܕܐܵܗܵܐ ܝܵܘܡܵܐ؛ ܟܲܕ ܠܲܝܬ ܗܲܓ̰ܲܬ ܕܝܹܗ؛ ܠܹܐ ܡܵܨܲܚ ܝܵܗَܒ̣ܵܚ ܓ̰ܘܼܘܵܒ ܥܲܠ ܕܐܵܗܵܐ ܟܸܢܫܵܐ. 41ܘܟܲܕ ܐܲܢܹܐ ܐَܡܸܪܹܗ؛ ܫܪܹܐܠܹܗ ܠܟܸܢܫܵܐ.